Kontak Home və Bakuelektronics-ın telefon fırıldaqları

"Son 5 ildə Azad İstehlakçılar Birliyinə ən çox mürəkkəb texniki vasitələrdən şikayət olunur. Bunlar arasında mobil telefonlardan olan şikayətlər üstünlük təşkil edir. Standarta uyğun olmayan, istehlakçının təlabatını ödəməyən, saxta və köhnə telefonların təzə adı ilə satılması və s. kimi hallar müşahidə olunur. Telefon satışı ilə məşğul olan qurumlar istehlakçıları aldatmaq üçün sanki biri-birilə yarışırlar. Birinci-ikinci yerləri də ardıcıl olaraq Kontakt Home ilə Bakuelektronics bölüşür".

Bu fikirləri videomüsahibəsində Azad İstehlakçılar Birliyinin (AİB) sədir Eyyub Hüseynov bildirib.
Onun sözlərinə görə, hazırda istehlakçıları aldatmaqda Kontakt Home öndə gedir:
"Bu şirkət sanki "pulunu ver mənə, itik cəhənnəmə" prinsipi ilə işləyir. Yəni malı satır, istehlakçının tələbinə uyğun olmayan bir mal aşkarlanır. Məsələn, istehlakçı təzə telefon alır, açır görür ki, telefonda şəkil var, demək işlənmiş telefondur. Bu zaman istehlakçı onu qaytarmaq və ya dəyişmək istəyir. Amma necə deyərlər, qapılar bağlanır. Müdriyyətin, heç kəsin qəbuluna düşmək mümkün olmur. Alqoritm "a" bəndi belədir: get servisə. İstehlakçı gedir servisə. Hansı ki servis də onların özünündür. Servis istehlakçının xeyrinə bir şey yazar? Sevis baxır, telefonu alan kimi ona bir cız salır. İstehlakçı onu görmür. Servisin işçisi bir lupa ilə göstərir, deyir ki, bura cız salmısan, bu telefon qarantiyadan çıxıb, gərək sən pullu təmir etdirəsən. Keçək "b" bəndinə. Ola bilsin ki, elə həmin cızığı satıcı salır. Ver, baxım deyir, alıcı üzünü döndərən kimi ora bir balaca cız qoyur. Yeri gəlmişkən, onu da deyim ki, bu cız xəstəliyi Kontak Home-dan Bakuelektronics və digər şirkətlərə keçdi və 4 il davam etdi. AİB buna qarşı çox ciddi mübarizə apardı. Bu işdə İqtisadiyyat Nazirliyi də bizə kömək etdi. "Cız xəstəliyi" qutardı".
Eyyub Hüseynov qeyd edib ki, Kontakt Home-də indi də yeni "trend"də olan "suya salmısan" xəstəliyi başlayıb:
"Vətəndaş gedir servisə, orada baxırlar, əksər hallarda deyirlər ki, heç bir şey yoxdur, nə dəyişmirik, nə qaytarmırıq və s.. Dükan da deyir, servis belə rəy verib. İstehlakçı nə qədər istəyir ki, müdriyyətin qəbuluna girsin, sübut etsin ki, vəziyyət belədir, amma çox çətinlik çəkir. Bundan sonra istehlkaçı ya bizə, ya da İqtisadiyyat Nazirliyinin uyğun şöbəsinə müraciət edir. Bizə yazılı müraciət olunur və mümkün olanı edirik. Bizim bu məsələdə əsas işimiz medianın köməyi ilə qurulur. Eyni zamanda şikayətləri dövlət orqanlarına da yönəldirik. Dövləq orqanları da şikayəti həmin şirkətlərə yönəldir. Onlar da yekə bir məktub yazırlar. Dövlət qurumu onun bir nüsxəsini bizə, bir nüsxəsini də şikayətçiyə göndərir.Və altdan da yazır ki, buyur, məhkəməyə müraciət et. Beləcə anormal vəziyyət daim davam edir".
E.Hüseynov dəfələrlə məsələ ilə bağlı Antiinhisar və İstehlak Bazarına Nəzarət Dövlət Xidmətinin rəisinə müraciət etdiyini də vurğulayıb:
"Demişəm ki elektron mallar satan qurumları toplayırsız, bir dəfə xəbər edin və 3 dəqiqə vaxt verin, onlara 1-2 söz deyim. Hələ də bu baş tutmur. 26 il ərzində mən yalnız onların hüquqşünasları və ictimaiyyətlə əlaqələr şöbəsinin rəhbərləri ilə görüşmüəm. Onda da özüm getmişəm. Bu görüşə niyə şərait yaratmırlar. Çünki istehlakçı hüquqlarını qoruyan bir təşkilatın rəhbəri onlar üçün arzuolunmaz şəxsdir".
E.Hüseynovun fikrincə, bunun digər səbəbi isə ölkədə istehlakçı siyasətinin zəif olmasıdır:
"1995-ci ildə "İstehlakçıların hüquqları haqqında" qanun qəbul olunub. sonradan qanuna 7 dəfə dəyişiklik olunub, hamisi da istehlakçıların zərərinə. Qeyd etdiyim kimi texnologiya dəyişir, onlayn təcarət genişlənir, cəmiyyət, həyat, biznes irəli gedir, qanun isə köhnədir. O qanunu yerinə yetirməli insanlar da həmin dövlət qurumunda birləşiblər. Onlar çox passiv işləyirlər. Bunun ciddi səbəblərindən biri odur ki, dövlət məmurları fəal şəkildə bizneslə məşğul olurlar. Belə bir şəraitdə istehlakçı hüquqlarının pozulması davam edir".
E.Hüseynov müsahibə zamanı Kontak Home-un istehlakçı hüquqlarını pozmasına dair konkret misallar da çəkib, bir sıra şikayətlər haqda danışıb.(BakuPost)